政Whats噏：建制留守保何君堯　出相撐鄧家彪

立法會今早(18日)審議譴責議員何君堯嘅議案，撞啱勞工界立法會前議員鄧家彪同樣喺早上報名參選立法會新界東補選，一班建制派議員為咗保住何君堯，大部分都要留守立法會，只有工聯會嘅陸頌雄及何啟明出席。不過冇出席嘅議員竟然可以以另類形式現身，佢哋預先與鄧家彪合照，印喺多張紙板撐鄧家彪，所以大合照都會見到呢班建制派議員個樣！

鄧家彪話，過去數年社會充斥惡劣政治文化，有政客為咗出位，提出激烈主張，甚至不惜代價嘅抗爭，泛民以拉布癱瘓代替監督施政，將爭取民主與犧牲一切劃上等號，希望參選能為選民找出新出路。

鄧家彪本來係工聯會成員，早前亦加入民建聯，但現場完全冇民建聯立法會議員。民建聯會務顧問譚耀宗解釋，雖然立法會已修改《議事規則》，但仍有拉布，所以該黨的議員要堅守崗位，未能出席。不過，新界東4個區議會主席、保安局前局長黎棟國、商務及經濟發展局前局長蘇錦樑、珠海社團總會會長鄺美雲都有撐場。

新界東補選另一名已報名參選的人士為陳玉娥。