政Whats噏：段崇智爆合作夥伴係屈蛇宿友

香港中文大學早前成為咗聯合國可持續發展解決方案網絡(SDSN)香港分區嘅聯合主持人，中大校長段崇智早前亦都為呢個項目嘅啟動禮擔任主禮嘉賓，今日(19日)仲喺自己網誌度話呢個項目為佢帶嚟「意外收穫」，原來佢撞番40幾年前喺佢宿舍「屈蛇」嘅宿友胡永泰，佢依家仲係SDSN總監兼東南亞區網絡聯合主席添！

段崇智話，40幾年前佢喺紐約洛克菲勒大學做緊博士研究，聽到有朋友幫人搵緊宿位，而咁啱佢宿舍有空間就叫咗佢嚟，佢就係胡永泰，不過當時段崇智剩係掛住喺實驗室做嘢，同胡永泰交流唔多，認識唔深，見都好少見，只知佢係美國Swarthmore College嘅馬來西亞華裔大學生，諗都冇諗過幾十年之後會有機會合作啊！

久別重逢當然要聚一聚，段崇智即刻約埋胡永泰去歎中式點心，細訴當年，仲話估唔到自己當年一個舉手之勞，胡永泰一直都係記住咁話喎！