政Whats噏：基委會換班　梁美芬升呢做護法

全國人大常委會下設嘅香港基本法委員會，預料將喺3月全國人大及政協會議(兩會)後換班，除咗有傳將會轉換主任同副主任人選外，政圈盛傳本身係城市大學法律學院副教授嘅立法會議員梁美芬，有望獲推薦成為香港基本法委員會委員，「升呢」做新護法。

香港基本法委員會由12名委員組成，內地同香港委員各6人，所有委員均由全國人大常委會任命，其中，香港委員由特首、立法會主席同終審法院首席法官聯合提名，報全國人大常委會任命。

梁美芬喺城大法律學院教書教咗好多年，據知今次基委會換班，希望搵一啲熟悉憲法同《基本法》、有從政經驗嘅人士加入成為委員，政圈盛傳梁美芬因而被睇中獲推薦成為新委員。

另外，現任基本法委員會主任李飛同副主任梁愛詩，盛傳喺換班後會退下火線，有傳將會由本身係憲法專家嘅澳門中聯辦副主任陳斯喜出任主任，而基本法前草委、現任基委會委員譚惠珠就有傳會接替梁愛詩做副主任。有分析認為，揀選陳、譚2人係考慮到佢哋熟悉憲法同《基本法》，加上有政治經驗，而基委會需要作政治判斷有關。