政Whats噏 ：葉劉自爆腳細　買鞋睇啱就要

行政會議成員兼立法會議員葉劉淑儀一向對時裝有研究，以往就曾經自爆鍾意玩時裝，最經典就係接受電台訪問時，忽然抬腿大騷高跟鞋，嚇親主持。不過佢同我哋講，原來佢對腳係「不符合比例的細」，所以買鞋一見到心頭好就要即刻買，唔能夠等減價，因為好快就斷晒碼。

依家正值季尾，其他身型細小嘅女士，同樣好難買到靚衫，所以葉太不時都會同身材相若嘅黨友分享心頭好。反而佢個女就絕少同佢交換衫着，一來年紀有差異，二來女兒大隻過佢好多，想着都着唔落。

葉太分享話，從政者一定要注意形象，爭取曝光，應該挑選啲顏色鮮明嘅服飾，加上農曆新年將至，所以依家買衫就應該揀紅色。葉太又透露，好多議員就算本身唔喜歡，都會儲埋好多中式服裝，因為要留番過年過節出席地區活動時着，就算每年買一件都儲到唔少。