政Whats噏︰葛珮帆鍾國斌唔怕摸頂買豪宅

2018年02月13日 12:41
東網電視
更多新聞短片
葛珮帆購入大埔鹿茵山莊單位,鍾國斌就購入清水灣道新盤一個頂層特色戶。(資料圖片)

喺美國加息陰霾之下,有市場人士預言香港嘅樓市將「寒風陣陣」。不過有立法會議員就無懼摸頂買豪宅,其中立法會議員葛珮帆(EQ)同紡織及製衣界議員鍾國斌(Felix)就先後入市,EQ購入大埔鹿茵山莊單位,而Felix就以3015萬港元,購入西貢清水灣道新盤1個頂層特色戶。睇嚟兩人唔止有「實力」,而且都鍾情於新界東豪宅噃!

EQ喺舊年購入鹿茵山莊一個單位,佢解釋之前一直住緊嘅沙田第一城已經住咗10幾年,啲嘢都好舊喇,要裝修嘅話都要使一大筆,加上佢都想換個環境,所以就同老公揀咗鹿茵山莊。雖然對經常往返立法會嘅EQ嚟講係搬遠咗,但佢就話如果唔塞車嘅話,其實同喺沙田住時差唔多,都係大約30分鐘車程就可以返到立法會。

樓市風高浪急,政府亦冇撤回樓市「辣招」,EQ入市唔知用咗幾多錢呢?點知不論係幾多錢購入單位,定係單位面積係幾多,EQ都話唔想透露,真係神秘。不過,佢就承認今次係細屋搬大屋,不過就唔係獨立屋,因為太貴「住唔起」喎。而我哋翻查資料,舊年鹿茵山莊非洋房嘅成交價1280萬港元至2650萬港元都有,而EQ仲未放售第一城單位就已經購入鹿茵山莊,睇嚟都好有實力。

市場人士預言樓市會下跌,EQ就話因為係自住,唔打算炒賣,所以認為可以負擔就購入,而且計落呎價其實唔係太高。至於會唔會出租或放售第一城單位,佢就話仲未諗定,因為新居收樓等咗好耐,佢依家同老公正忙於執屋,之前淨係搬咗行李入去瞓,呢兩日先至搬傢俬,真係「七國咁亂」,希望農曆新年前可以完成螞蟻搬家任務咁話。

除咗EQ,Felix上月中先至以3300萬港元賣出西貢匡湖居雙號屋,旋即就喺同月月底以3015萬港元,入手清水灣道新屋苑頂層單位。其匡湖居舊單位面積為1372平方呎,而清水灣頂層單位則為1493平方呎,仲連1157平方呎天台添,同EQ一樣都係細屋搬大屋。Felix就話自己都係買嚟自住㗎啫!