政Whats噏:周庭踩場嗌早抖 陳家珮叫回頭是岸

20180214
東網電視
更多新聞短片
陳家珮(左)同周庭(右)喺年宵上互送揮春。(徐家浩攝)

臨近歲晚,唔少政黨有喺年宵擺攤位,立法會補選港島選區候選人、新民黨陳家珮今日(14日)就喺新民黨嘅維園年宵攤位同市民接觸,殊不知第一個接觸嘅係香港眾志常委、被取消參選立法會補選資格嘅周庭,佢着住一件印住「早唞(抖)啦你」同幾個建制派議員「恰眼瞓」嘅圍裙踩場,叫陳家珮同佢啲支持者「早抖」啊!

除咗用條圍裙暗串陳家珮之外,周庭仲準備咗兩張揮春「旗海飄揚」、「芳蹤杳然」送畀陳家珮,笑佢啲街站成日都冇人,淨係插兩支旗就當自己落咗區,完全「影都冇」,啲市民想搵佢都唔知點搵,不過陳家珮就話港島區都好大,自己已經周圍去,例如今朝就去咗香港仔,但始終唔識「分身」,咁咪惟有靠啲義工幫手囉!

周庭跟住提到陳家珮推咗好多外媒訪問,點知都未問佢係咪因為英文差,陳家珮就隨即反擊:「係咪同你好熟嗰啲日本傳媒?」周庭解釋話除咗日本,仲有好多歐美媒體,陳家珮即刻斬釘截鐵咁話,如果當選就一定會接受所有媒體嘅訪問,仲即刻回贈一個「福」字畀周庭,話香港依家最重要係一團和氣,祝周庭回頭是岸!

參選港島區補選嘅候選人仲有南區區議員區諾軒、獨立伍廸希、「維園阿哥」任亮憲。