政Whats噏:政治不穩 狗年恐有局長要下台

20180214
東網電視
更多新聞短片
狗年政治不穩,農曆9月官場或會出現明爭暗鬥。(設計圖片)

香港喺2018年立春後已經咁多事發生,到底狗年會愈行愈衰,定係否極泰來呢?東網今年再邀請香港術數家協會術數師楊子東為狗年運勢把把脈。楊師傅話農曆9月官場會出現明爭暗鬥,甚或有局長牽涉重大件事,引發下台危機,由於政治不穩,亦影響到經濟變差。

楊師傅話狗年木火比較旺,火庫一開就會發生屬土的災禍,所以立春後正式踏入狗年,台灣有地震、香港又有車禍,佢特別點出狗年要特別注意嘅月份,其中農曆5月怨氣好重,可能有大企業會倒閉,引發啲「嘈喧巴閉」嘅事;農曆6月,國際上屬北面嘅地方會發生重大事故,容易有大火災、大爆炸、病毒等,而上半年空災特別多,立秋後就開始轉好。而農曆7、8月氣場亦唔好,容易有大型交通意外,尤其係西區,例如西環、西營盤、上環,荃灣、屯門,呢兩個月出入、駕車要特別小心。

至於官場熱廚房亦唔好得去邊。楊師傅話農曆9月官場會有麻煩出現,例如官場明爭暗鬥等,由於政治影響經濟,政治不穩,經濟就會變差,農曆9月可能有某位局長牽涉重大事件,甚至引發下台危機。至農曆10月,西方國家易有火山爆發,農曆11月,包括香港在內的東面,易有泥石流、山泥傾瀉、撞車,而東面國家及地區或發生地震。

至於狗年經濟方面,楊師傅話2018年係近10年來最差嘅一年,要跨越冬季,到2019年經濟才會開始好轉,所以今年投資、買樓同重大發展,一定要睇清楚。佢又話由於狗年土火旺,一定要行金運,農曆7、8月會向好,即使投資者喺上半年有損失,相信下半年可以收復失地,而偏門行業在下半年亦特別興旺。都係嗰句,風水命理同八字批算,目的都係想幫人趨吉避凶,但信則有、不信則無,好與壞都毋須太上心。