「飛車黨」深夜闖馬鞍山　居民怒斥遭噪音嚇醒

瞓到半夜突然被車吵醒，難怪一班街坊怨聲載道。近日網上有片段指，馬鞍山有近20輛車深夜發出極大的噪音，嚇醒附近一班街坊。有居民狠批「飛車黨」擾民。

從Facebook群組「馬鞍山之友」的片段可見，星期六（17日）凌晨約2時，有約20輛車在馬鞍山落禾沙里，懷疑聯群結隊逆線右轉入西沙路，並越過影線區駛入馬鞍山繞道，期間更發出極大的引擎聲，附近屋苑的高層住戶亦能清晰聽到。

不少居民怒轟噪音極為擾民︰「我都聽到、睇到！真係好討厭」、「我個仔尋晚就係因為呢啲聲嚇到瞓唔到」、「嘈到拆天，仲要凌晨先嚟嘈」，亦有網民斥「車隊」逆線行車「好威咩」、「玩車玩到逆線亂咁嚟」。

沙田區議員李永成表示，過去曾接獲附近多個屋苑的居民投訴，指「飛車」造成嚴重噪音滋擾，曾向政府提出增設隔音屏障但未獲批准。不過，李永成指已向警方要求加強執法及檢控，並建議警方增設攝錄器及加強巡邏，以減輕「飛車」噪音對居民所造成的滋擾。

警方則回應指，於2月17日凌晨約2時，先後接獲市民舉報，指有超過20架車輛在馬鞍山西沙路及馬鞍山路一帶高速行駛，並造成嘈音滋擾。警方隨即調派多輛巡邏車到場兜截，並在西沙路設立路障，截停及檢查35部車輛，並與全部司機進行隨機酒精呼氣測試，有關車輛及司機均通過檢驗及酒精呼氣測試。

警方表示，新界南總區交通部在過去3個月共進行逾670次路障執法行動，拘捕67名涉嫌酒後駕駛司機及檢控超過8,900名涉嫌超速駕駛的司機，並扣留144輛車輛作進一步檢驗。有關嚴厲執法行動仍然持續進行。警方強調，絕不容忍任何非法賽車活動，會繼續透過收集情報及策略性部署，打擊非法賽車及危險駕駛行為。

---------------

《港呢啲》：大事小事騎呢事，東網嚴謹選題，輕鬆製作！