政Whats噏：激進派運蹇　之鋒再踎監戴耀廷招災

近年社會趨向兩極化，尤其新興起一班本土自決派，到底一班較激進嘅人士喺狗年運程順唔順暢呢？東網繼續邀論香港術數家協會術數師楊子東為佢哋批算，楊師傅就批算香港眾志秘書長黃之鋒同立法會前議員梁國雄，今年都有機會要坐監，而佔中發起人戴耀廷喺農曆6、9月，如果佢有大動作會招災、被人拉，至於青年新政嘅游蕙禎則衰到冇運行。

楊師傅指，以面相睇，黃之鋒唔似搞政治，搞政治一定要上唇薄先會成功，否則會較吃虧，建議佢諗下做第二樣好過。黃之鋒係弱水命，忌土，今年係戊戌年，會好大鑊同唔吉利，佢係官殺混雜，凡係官殺混雜嘅人，如果係弱命，特別容易坐監，最麻煩係5、6、9月，今年坐監機會好高。

至於梁國雄係弱水命，忌土，62歲後，即係今年開始冇運行，就算幾有政治魅力，成功機會都好低，運過即止，佢行咗10幾年金水運，依家行土運，個運就壓制佢，土剋水，尤其今年，大運又戊戌，流年又戊戌，雙重忌神，搞得唔好，農曆5、6、9月，分分鐘要入監房休養下。

戴耀廷係水命，楊師傅指佢行七殺運，七殺即係強硬，囂張，但佢較敏感，大運係丙子，有啲幫助，農曆6、9月，如果佢有大動作會招災，一定係拉佢，最終有冇事就唔知，農曆12月係最差，丑戌未三刑，佢係水命，咁多土窒住佢，好似水倒落土咁，會被索晒，即係幾強硬都好，因為抵制壓力太大，若今年唔想惹官非，最好收口，尤其農曆6、9、12月都易犯官非。

至於年輕本土自決派嘅運程，楊師傅話游蕙禎如果以正格睇，衰到冇運行，逢係呢種八字正格，行到呢個運，一定冇運行，雖然仲有政治魅力，但係曇花一現，對他人會愈幫愈忙，幫人助威吶喊會反效果，今年完全冇運行，如果唔乖乖哋，會同大運對著幹，會好大壓力及吃力不討好，如果要行運要30歲後，呢3年應該閉關進修下，如果呢3年hea，3年後政治魅力都不大。而游蕙禎嘅黨友梁頌恆，楊師傅話佢行出嚟都冇政治魅力，唔好行出嚟好過。

被取消立法會議員資格(DQ)嘅香港眾志主席羅冠聰係1993年出世，屬雞，乙木命，財生殺旺，姻緣同桃花運方面，容易吸引某類人，但佢兩面不是人，風吹一吹就歪咗，個運對佢嘅衝擊太大，可以由天上落到地獄，而且八字唔強，水木用神，依家財強身弱，表面風光，行出嚟好似好威，但內心世界好虛，冇底氣，平平無奇，不論做唔做議員，都要32歲後才有運行，今年唔多好運。

同樣被DQ嘅劉小麗係1976年出世，屬龍，雖然沖太歲，但冇事，丁火命，木火用神，但今年木火唔旺，土太勁，大運同流年對著幹，唔樂觀，覺得佢不如返去教書，但早前被揭與四眼男同遊台灣嘅佢，喺姻緣方面就有好消息，楊師傅批算，劉小麗2020年「唔嫁都幾難」，就算唔嫁都同居，出嫁機會非常非常大。