政Whats噏：立會考察大灣區　民主派十五十六

立法會考察粵港澳大灣區一事一直只聞樓梯響，今日(23日)身兼行政會議成員嘅立法會經濟發展事務委員會主席林健鋒就宣布，立法會4個委員會將於4月考察大灣區5個城市，仲會邀請同4個委員會對口嘅政策局官員同行，並已聯絡內地各市領導、市長等帶議員參觀添。去得內地考察，各界又再關注民主派議員會否隨行，過去民主派經常批評內地拒發回鄉證，今次內地釋出善意，部分民主派又十五十六、扭扭擰擰，驚呢樣驚嗰樣，莫非甘願做井底之蛙？

林健鋒今日話，立法會經濟發展事務委員會、工商事務委員會、財經事務委員會、資訊科技及廣播事務委員會將於4月20日至22日到內地大灣區考察3日，預計到訪5個城市，包括東莞、廣州、中山、深圳及佛山，會去參觀當地嘅基建、企業，而相關城市市長同各市領導都會向一眾議員講解大灣區嘅發展；下月1日就會開會討論考察嘅細節。

除咗議員之後，林健鋒仲話會邀請埋4個委員會對口嘅相關決策局官員同行，即商務及經濟發展局局長邱騰華、創新及科技局局長楊偉雄、財經事務及庫務局局長劉怡翔、政制及內地事務局局長聶德權。現時4個委員會主席除了林健鋒屬建制派外，其餘3個委員會主席都係民主派，包括工商事務委員會主席胡志偉、財經事務委員會主席梁繼昌、資訊科技及廣播事務委員會主席莫乃光，3人都表明會隨團。

林健鋒就提到，民主派同建制派都有議員表達有興趣去考察大灣區，但有一兩個議員係冇回鄉證，希望佢哋想去嘅話就盡快同相關機構申請喇。據了解，民主黨涂謹申同街工梁耀忠都係無回鄉證嘅，但梁耀忠同人民力量陳志全就傾向唔去；而熱血公民鄭松泰及本土派議員朱凱廸更加講到明唔會去，鄭松泰仲話擔心返咗內地有危險添。至於涂謹申就話自己未有回鄉證，亦都未決定去唔去，要同黨友傾完先至決定喎。而公民黨亦未決定去唔去。

每逢返內地考察，對民主派嚟講可以話係一個考驗，好驚隻腳一踏入內地，就被外界標籤，而且過往經常批評內地拒發回鄉證，依家內地釋出善意，回鄉證有效期仲可能係10年期添，但民主派就「葉公好龍」，個心十五十六、扭扭擰擰、表現得驚驚青青。其實內地發展可以話一日千里，如果班民主派只係識開口埋口批評內地，固步自封，真係注定做井底之蛙。