政Whats噏:護理員薪酬混淆視聽 李卓人變李屈人

20180225
東網電視
更多新聞短片
靈實澄清咗助理照顧員並非護理員,今次李卓人真係變成李屈人啦!(設計圖片)
職工盟秘書長李卓人日前喺社交網站貼文,批評身兼行政會議成員嘅基督教靈實協會(下稱靈實)行政總裁林正財接受訪問時講過,依家加兩個薪級點畀安老院舍都請唔到人,然後鼓吹輸入外勞,但其所屬機構就用1.1萬多港元請人,人工比社署薪級表嘅1.4萬多港元仲少,遭靈實點名批評李卓人嘅言論係不合理同不正確,又澄清指李卓人比較錯咗職位。今次李卓人真係變成李屈人啦!
李卓人喺社交網站貼出一張喺勞工處刊登嘅招聘廣告,顯示靈實以月薪約1.1萬港元,招聘助理照顧員,其職責係服務家居或日間中心長者嘅日常護理照顧工作,包括送飯、陪診及清潔。李卓人更放咗一張林正財嘅相,畫咗兩隻角同一個長鼻。李卓人指林正財曾經話過,依家加咗兩個薪級點畀安老院舍都請唔到人,鼓吹輸入外勞,但其所屬機構就用1.1萬蚊請人,人工比社署薪級表嘅1.4萬多港元仲少,又形容助理照顧員係「巧立名目」嘅職級,做嘢就係護理員工作,認為佢剝削到盡,但公開又話加咗薪級點,係講大話。
靈實就兩次澄清,助理照顧員並非護理員,亦與院舍照顧員嘅工作性質不同,毋須過夜,就工作性質、學歷同經驗要求都唔同,難以相提並論,而靈實嘅院舍照顧員入職薪酬有約1.5萬港元,遠高於社署所要求嘅1.4萬多港元。靈實喺其中一次澄清中,更點名指李卓人喺社交平台,以社署津助院舍嘅個人護理員起薪點作比較係不合理及不正確。李卓人未搞清楚件事,就屈咗人嘞!
其實李卓人都唔係第一次搞到啲事唔清唔楚,好似之前搞海麗邨外判清潔工人罷工事件,其時有人質疑職工盟利用工人名義籌得20幾萬港元,而扣除工人津貼,仲剩低唔少捐款,外界質疑職工盟藉工人名義籌款,但捐款就成為政黨未來工運經費,等同詐騙捐款人。職工盟其時發稿證實總共剩低近23萬港元,聲稱會用作工人抗爭,絕不用於職工盟營運開支,李卓人其時話籌款時已講明餘額用途,海麗邨工人都知道,有關講法係侮辱工人喎。李卓人每次搞事都咁唔清唔楚,惹來咁多爭議,唔該佢自我檢討一下,到底係邊方面出咗問題啦!