近日網上社交平台流傳多張美女舊照，惹起網民熱議！相中女仔眼仔睩睩，眉目清秀，着住件橙色間條T恤，頭髮微濕，真係睇見都心動。而其中一張相片更見少女回眸一笑，笑容甜美程度簡直可以迷倒一眾少男！

究竟相中美女係邊個？可能大家都識，無錯！佢就係西貢區議員方國珊（哪吒），不過依家「哪吒」就戴咗副眼鏡，可能大家未必認得出嘞！

多張舊照之中，仲有一張係佢嘅中文大學學生證，當時佢年僅24歲咋。佢喺2014年為咗聲援學界罷課運動，為校友加油而將照片曝光。

網民紛紛大讚佢靚女，有人更戲稱呢幾張相係「方國珊最強助選武器」︰「今次補選一早拿出來的話，可能已經當選」、「下次參選用呢D（啲）相做海報」！

《港呢啲》隨即致電方國珊，佢就話好多謝網民讚賞嘞。佢解釋自己後生嗰陣係泳隊健兒，嗰張濕身照係練完水之後影嘅。至於嗰張回眸相，佢話自己嗰時喺電視台做緊兒童節目，出外景拍攝影低。

其後，佢笑指當時自己好細個，年少無知，都幾「萌」咁話喎！佢仲話細個嘅經歷同選舉都有關係，「累積先有成績」！佢話佢依家「大個女」，佢衷心多謝市民喺立會選舉嘅支持，會繼續努力，服務市民！

---------------

《港呢啲》：大事小事騎呢事，東網嚴謹選題，輕鬆製作！