政Whats噏：葉劉否認Judy問樁腳攞「戶口簿」

立法會補選結果塵埃落定，喺港島區落敗嘅新民黨南區區議員陳家珮(Judy)，早前遭多名地區人士傳出無去拜票「打招呼」，選舉過後亦冇收到過Judy講多謝，有人更指選舉期間，有人問地區人士攞「戶口簿」(支持者聯絡方法)去拉票。新民黨主席葉劉淑儀今日(19日)就澄清，謝票需時，又強調冇叫人交出戶口簿，因為咁樣做係違法同違反私隱。

葉劉淑儀強調，該黨並無問人攞戶口簿，呢種做法係違反法例、違反私隱，即使自己嘅戶口簿都唔會畀Judy，又點會問人攞。葉劉指，戶口簿係每位議員努力嘅成果，亦受到個人資料(私隱)條例保障，未得許可，不能轉交其他人，已經再詢問過黨內負責地區聯絡嘅同事，絕無此事，可以保證支持者嘅個人資料不會遭洩露。

葉劉又指，謝票方面，涉及多名政黨、社團等等，依家仍然努力謝票中，但太多人幫過手，需要時間逐一致謝。葉劉又重申，Judy今次喺補選中僅輸約9000多票，成績已經好好，不能單單與2016年立法會換屆票數比較，因為今次係涉及建制泛民兩大陣營嘅選舉。