政Whats噏：林健鋒轉形象變野豬鋒？

喺香港見到野豬絕對唔係一件新鮮事，近年幾乎可以稱得上係「梗有一隻喺左近」，尤其係半山區見得仲多。自由黨山頂區議員楊哲安(Jeremy)，甫上任就畀野豬咬爛鞋，更因而蜚聲國際，有外國傳媒跟進。無獨有偶，立法會商界議員林健鋒(Jeffrey)今日(21日)提口頭質詢，就係關注野豬問題，仲擔心啲豬會將環境局局長黃錦星撞落山添！林健鋒忽然關注野豬問題，唔通佢想轉形象變野豬鋒？

Jeffrey今日喺立法會大會上提口頭質詢，話近來唔少野豬覓食嘅時候，走入民居影響市民，而且問題有從郊區蔓延到市區嘅迹象，有啲野豬仲會撞傷或咬傷人，問政府會點樣處理同跟進問題。

黃錦星就話，過去5年漁護署接獲嘅野豬發現或滋擾嘅投訴數字，由2013年嘅294宗，上升至舊年嘅738宗，漁護署已經開始檢討相關政策，舊年率先叫停兩隊民間野豬狩獵隊嘅工作，並開始進行為期2年嘅野豬避孕計劃，兼植入晶片同全球定位儀器，跟蹤野豬生活範圍。

Jeffrey追問嘅時候，就話自己見過野豬，「有啲仲大隻過局長你啊！」佢又話黃錦星成日行山，好擔心佢嘅安全，「撞咗你落山崖咁點算？」黃錦星只好無奈地安撫Jeffrey，叫佢唔使擔心，話只要鎮定啲就會相安無事。

事後問番Jeffrey，佢就話完全唔知Jeremy有跟開呢個問題。咁點解忽然關心野豬問題，佢解釋，因為好多朋友住喺黃竹坑、半山同薄扶林都見過野豬，強調「我真係親眼見過」，有次坐車離開時司機突然急煞車，「好彩有戴安全帶咋」，真係嚇咗跳。佢最後好慨嘆咁話，自己跟進呢個問題，「都係想香港太平咋嘛」。睇嚟今次真係飛機撞紙鳶，咁啱得咁橋，Jeffrey同Jeremy都係被野豬襲擊過嘅受害者。