政Whats噏：反對派未埋位　臨時撥款極速通過

立法會噚日(21日)啱啱開始傾涉及1131億港元嘅臨時撥款決議案，民主派嘅陳志全同朱凱廸講明要藉臨時撥款去逼政府改修改財政預算案，原本大家都預計有排傾。點知今(22日)早9點一開會，兩分鐘就極速通過咗，睇嚟都係反對派未起身累事！

立法會大會早上9點繼續開會，其時好少人返咗嚟，而陳志全等人都未返到，冇議員要求發言。財經事務及庫務局局長劉怡翔知道機會嚟啦，發言都極短，得40幾秒，淨係簡單講咗兩句各政策局遲啲會喺特別財委會解釋，希望議員支持臨時撥款。主席即時就表決，又冇人要求記名表決，舉手就通過咗嘞。

由朝早再開會到表決，只係大約兩分鐘，多名議員喺走廊路過時，才發現已經通過咗臨時撥款，包括陳志全。陳志全原本打算行入會議廳，但發現已經通過咗，就冇再行入去。今次證明早起的鳥兒有蟲吃，打工仔返工都唔可以遲到啦，各位議員，開會真係要準時啦！