政Whats噏：葉建源訪葡大發現　教育會議每周都有

教育界立法會議員葉建源到葡萄牙有「開心大發現」！話說葉建源早前同教協副會長張銳輝到里斯本，出席當地嘅教育會議，其後拜會葡萄牙國會嘅教育及科學委員會，獲得委員會主席Alexandre Quintanilha及各黨議員接見，原來當地嘅委員會組成和運作，同香港立法會教育事務委員會大不相同，例如香港每月開會一次，葡萄牙則是每周一次，葉建源等人之後仲短暫旁聽會議，直擊佢哋使用視像會議進行聽證，佢嘆道，可惜完全聽唔明葡語喎。

另一方面，葉建源亦有出席於當地舉行嘅第八屆「國際教學專業高峰會議」，出席者包括各國教育部長同工會領袖，佢發言時特別提及，政府對於教育嘅支持必須到位，否則好意可能帶來相反結果。

佢舉例指，對於有特殊教育需要(SEN)或非華語學童等，放喺主流學校有助社會融入，本身用意係好，但若然沒有足夠受過相關訓練嘅教師，沒有合適課程，最終可能於主流學校內遭隔離，呢個係香港必須努力克服嘅問題。