政Whats噏：國際天九榮譽會長？Tree根話唔識打

新界傳統文化之天九王大賽今日(25日)喺沙田鄉議局大樓舉行，前立法會議員鍾樹根(Tree根)突然做咗國際天九協會榮譽會長，但樹根就自爆，原來佢唔識打天九，外母就識打，不過佢就唔敢向外母請教點打喇，怕外母嫌佢學唔識。有份主辦今次比賽嘅上水鄉事委員會主席侯志強就話，今年內打算再搞省港澳盃，其後再搞全國大賽及國際級大賽添。

樹根冇做議員後，就醉心搞農業，笑指生意應該好好，近日發展緊微生物肥料，可以殺蟲，成本又低啲，依家不時周圍飛，今次有朋友搵咗佢做國際天九協會榮譽會長，佢同太太都唔識打，早知帶埋識打嘅外母嚟啦，朋友都特登畀咗本書佢去學打天九，佢依家都會趁搭飛機嗰陣睇吓點樣打。

侯志強早前已經向東網透露，自細識打天九，自己落場無父子，但新界人有修養，點都會留返條底褲畀人，唔會令人光住屁股走出嚟，又指鄉議局主席劉業強都識打天九，仲會教佢兩招添！

問到侯志強最多試過贏幾多，佢就話無止境、無極限，又話如果冇貪心就冇上進喎，佢仲話唔識寫個輸字，依家慢慢學緊，贏又要學，輸又唔好氣餒，保持心情要靚喎！呢個理念係咪可以用喺選舉呢？佢就話樣樣都要係，人生無常，輸完又嚟玩過，輸得起就得㗎啦，咁下次補選仲係咪參與呢，佢就話積極考慮，但又話「呢次我都冇玩啦」，有時好難講，一石激起千重浪，如果有頑石激起就玩下囉！

講起十八鄉鄉事委員會主席梁福元早前提過考慮退休，侯志強就話，梁福元咁有才能，退咗休係鄉事嘅損失，如果對方退休，應該一退就全退，佢就少個敵人，又請少個人飲茶。佢又話，自己都諗緊退休，因為年紀都大，啲仔又話佢成日得罪人，如果鄉親唔畀佢做就退休，佢都冇辦法。