政Whats噏：大講人工智能　劉怡翔撈過界？

人工智能(AI)係近年興起嘅熱話，不過著名物理學家霍金，生前就多番警告大家要小心AI。財經事務及庫務局局長劉怡翔今日(25日)都喺網誌藉惋惜霍金近日離世而大談AI，唔通佢撈過界搞創科？

劉怡翔講起，霍金生前多次表達對人工智能嘅擔憂，曾以無人駕駛為例，指喺緊急情況下，無人駕駛汽車需要喺「好有可能發生嘅輕微事故」同「較低可能發生但嚴重事故」之間作選擇，處於兩難。

佢指近日美國發生自動駕駛汽車嘅致命交通意外，令人疑惑到底係無可避免，定係人類過分依賴自動駕駛系統而警覺性降低。佢又話，霍金曾講過，人類長遠要面對AI系統失控嘅潛在風險，假若AI脫離束縛，有超級智慧嘅機器人就會崛起，有可能不遵循人類意願行事，反問科幻電影片段真係唔會喺現實世界發生咩？

劉怡翔形容AI係「雙刃劍」，希望會成為資產而非負累，當局喺推動人工智能、應用金融服務時，要平衡創新同控制風險喎。睇嚟都係因為該局近排搞金融科技，令佢咁感觸嘞！