每日一片： 阿叔隨機偷包裹　目擊男被狠批見死不救

速遞包裹貨件，準時到達外，最重要當然是貨件完整無缺，如果一旦遺失，後果可大可小。近日有車Cam拍得一輛速遞貨車在工廠區停下，一名阿叔趁速遞員忙於處理貨件時，偷走其中一盒貨件，事件除了阿叔被質疑「唔知貨件係咩都偷？」，亦連帶拍攝片段的司機亦遭狠批「見死不救」，擔心速遞員因遺失貨件，最終飯碗不保。

事發於昨日(4日)上午11時半，現場是紅磡工廠區，片段所見，速遞貨車停泊於工廠大廈停車場外，當時尾門開啟，而速遞員則在車斗忙於處理貨件，期間一名戴闊邊帽，短褲，一身夏日Look的阿叔在車斗外徘徊傾電話，左望右望一輪後，便走到車斗，取走一盒較手機電話稍大的貨件，塞入所攜環保袋後便匆匆離去。

網民看過片段後，直指以阿叔一身打扮，肯定並非速遞員，估計他是貪心隨手偷走貨件，「連件嘢係咩都唔知就笠？？？？偷返去原來係包鈕之類就好笑」。不過更多人將焦點放在拍攝片段的司機身上，認為速遞員一旦遺失貨件，一定要負上責任，甚至令飯碗不保，「唔幫手捉賊都大聲呼喝吓，個速遞唔見咗件貨後果可能相當嚴重！」「做乜唔落車捉住佢？」被網民連環炮轟，目擊司機亦不得不留言解釋，指當時並不肯定對方偷竊，所以才沒有採取行動。