政Whats噏：郵輪碼頭捉精靈　區諾軒話係鬼地方

兩年前一度風靡全港嘅手機遊戲Pokémon GO，唔知仲有幾多人有玩？今天(9日)立法會人事編制小組委員會會議上，傾緊延續旅遊事務署嘅首長級丙級政務官編外職位時，民主派議員區諾軒主動講起自己到依家都仲會周圍去「捉精靈」，到底兩件事之間有咩關係呢？

原來當時傾緊嘅有關職位主要係負責啟德郵輪碼頭、迪士尼樂園相關嘅旅遊項目，區諾軒就話自己兩個地方都去過，不過就唔係去旅遊，而係去「捉精靈」，仲笑呢兩個地方都係「鬼地方」！事關Pokémon GO設計到某啲稀有精靈只會出現喺偏遠地區，而呢啲稀有精靈除咗喺迪士尼擴建區出現過，啟德郵輪碼頭更加係稀有精靈出現嘅熱門地區，仲特別多「鬼系精靈」出現，結果就連一個手機遊戲都知郵輪碼頭係一個人迹罕至嘅地方，政府想將郵輪碼頭打造成旅遊熱點，真係仲有好大段距離喇！

不過區諾軒仲話，就算郵輪碼頭出現稀有精靈都好，都唔係咁容易入到去，因為佢多數係沿觀塘海濱花園跑步入去，路上有時會冇咗照明系統，有時需要跑馬路，而嗰段馬話係賽車熱點，都咪話唔危險！所以如果政府真係想搞好郵輪碼頭嘅發展，交通不便呢個問題一定要解決咗先喇。