政Whats噏：遊澳洲學塗鴉　林琳齋上色

身兼行政會議成員嘅立法會議員張國鈞，佢喺中西區嘅議員地區辦事處大閘曾被塗鴉，原來荃灣區議員林琳都玩過，但唔係喺香港，而係喺澳洲，仲係一日貨仔咁多喇！

林琳喺Facebook上載咗張相，係佢舊年去澳洲參加一日遊嘅團，跟新西蘭嘅藝術家學塗鴉，而佢後面嗰幅圖，就係佢嘅傑作，亦係佢嘅英文名Nixie，但構圖唔係佢，佢只係負責填色啫，但就已經覺得好好玩。

當地政府亦都有推動塗鴉文化。林琳話悉尼政府有開放部分滑板公園畀人公開練習塗鴉，而好似佢有份填色嗰幅畫喺私人地方，事先要同業主傾好，而行內亦有分黨派，大家有自知之明，畫得差嘅人唔會覆蓋勁人嘅畫，而但凡見到任何紀念去世親友嘅畫作，會加一支白色蠟燭，大家都知道尊重去世的人而唔會覆蓋佢㗎！

講到出路，佢話因為澳洲有好多地舖咖啡室等等嘅舖頭，經常都會邀請唔同嘅藝人過去設計廣告牆壁，所以收入都唔錯喎。