政Whats噏：陳帆首回應P圖風波「係有啲唔同」

運輸及房屋局局長陳帆上個月去屯門欣田邨視察嘅相，被網民質疑係P圖，仲要將佢張相大改，P咗去金字塔同太空等唔同地方添，真係唔使隨意門都可以環遊世界呀！就連立法會議員陳恒鑌都玩埋一份，將自己P埋落去同陳帆一齊周圍「視察」。陳帆睇番都話覺得有啲唔同，但強調係真相片，多謝大家關心。

有專業人士分析過，就懷疑同閃光燈及現場光線等處理得唔係咁好有關，搞到大家誤以為係P圖。

陳帆親身回應東網查詢時笑個不停，指自己都諗唔到會被人以為係P圖，睇番張相都覺得有啲唔同，但強調「冇改圖，係真相」，當日真係有落區，可能係後面嘅大廈距離遠，先導致大家有咁嘅錯覺，啲相一向係新聞處同事處理，自己喺出稿前都冇特別留意。

對於有網民將佢P咗去唔同嘅地方，陳帆話多謝大家關心，大讚網民創意十足，好得意，自己完全唔介意喎！