政Whats噏：周庭變教師　出題考黃之鋒

香港眾志尋日(10日)喺Facebook貼咗一條短片，場景係喺課室入面舉辦「BCA(基本能力評估研究計劃)問答比賽」，條片一開始就見到香港眾志常委周庭企喺中間主持大局，仲出題考香港眾志秘書長黃之鋒，唔通佢之前無緣參選立法會之後，走咗去做教師？

原來唔係，事緣係教育局喺上月中公布復考BCA，令唔少學校同家長都擔心會令學生出現過度操練嘅情況，所以香港眾志就拍咗條短片反BCA。

片入面黃之鋒同兩個小三學生組成「豆丁衝鋒隊」，立法會議員陳志全(慢必)、家長聯盟Annie、香港眾志常委鄭家朗組成「慢有引力隊」，而周庭就負責問問題，睇下邊隊答得多答得快。

有兩個小三學生帶住果然係唔同啲，「豆丁衝鋒隊」可謂由頭帶到尾，無論係中文講故事嘅題目，定係要動腦筋計數都冇問題，相反三個大人組成嘅「慢有引力隊」，連小三數學題都計錯，真係失色咗啲喎！不過兩個小三學生都話希望可以「一邊玩一邊學」，如果可以無痛苦學習就最好喇！