政Whats噏:陳細潔卸任保良局主席 難忘搵友捐錢

2018年04月16日 13:32
東網電視
更多新聞短片
陳細潔(左)嘆做保良局主席忙到假都冇得放;右為其姊陳小寶。(徐家浩攝)

保良局今日(16日)換屆,啱啱卸任保良局主席嘅陳細潔(Abbie)就話好唔捨得,話晒佢由總理開始,已經服務咗保良局11年,所以不捨之情多少都有啲㗎喇!不過佢覺得做咗咁耐都好足夠,特別係佢做主席嘅呢一年,平均每日都只係瞓得4至5個鐘,公司嘅業務更加係完全冇打理,全職投入做主席,真係忙到冇停手,期間好多假期都取消咗,所以嚟緊7月會去英國放大假,好好休息吓咁話!

問到任內遇到過啲咩困難,Abbie就話籌錢係一個難題,事關好多人以為保良局已經有多年歷史,實係有好多錢,但實情保良局嘅開支都好大,每年大概要使30億港元,而就算扣除政府資助,每年都要籌錢10億,所以Abbie上任以嚟成日都要搵啲老友捐錢,仲要親自做計劃書、親自上門去解釋,咁先可以說服到人捐錢,唔怪得Abbie呢一年忙到連假都冇得放啦!