政Whats噏︰住青年宿舍有咗點算？鄺俊宇憂迫遷

立法會工務小組委員會今早(17日)討論保良局元朗馬田壆青年宿舍建造工程，工程涉款14.4億港元。青年宿舍對象係18至30歲、符合相關入息水平上限嘅香港永久性居民，仲接受1人申請或2人申請添，即係話想享受獨居或者二人世界都可以申請入住。不過，孤男寡女共處一室，可能會「出事」。立法會議員鄺俊宇(Roy)會上就問，如果2人單位住戶有咗BB點算，仲話相信呢個情況係「正常不過」。

阿Roy呢個問題可能都考起與會嘅民政事務局副局長陳積志，陳積志回應完如果懷孕應該會有安排後，就交咗個波畀保良局行政總監陳欽勉。陳欽勉就話，佢哋二人單位嘅設計確實係唔太適合小家庭嘅，不過佢哋會有5%嘅單位係畀有特殊需要人士。

阿Roy聽完就問，如果出生率高於5%咁點算，又話相信有咗BB都係開心事，希望有關方面可以人性化處理，唔好迫遷咁話。

而議員陸頌雄就話，青年宿舍以不高於市價60%出租，相信好多年輕人都有興趣，包括家有千呎嘅小康之家青年，或者係屬於「擠迫戶」嘅年輕人都可能會申請，希望當局能作出篩選。而議員張超雄就希望，原本居於兒童院舍，但需要遷走，或牽涉家暴問題、有特殊需要等人士可優先入住。項目最終喺23票贊成、1票反對、1票棄權下獲得通過。