政Whats噏:唔係結婚 柯創盛因乜公開講我願意?

20180417
東網電視
更多新聞短片
柯仔(左二)今日出席支持器官捐贈嘅活動時話,好多年前已簽咗器官捐贈卡。(葉華英攝)

公開承諾唔係每個人都做得到㗎,立法會議員柯創盛(柯仔)都話,自己好少公開講「我願意」,對上一次已經係結婚嘞,不過,另一樣嘢佢都肯公開講「我願意」喎,就係捐贈器官嘞。睇嚟呢樣嘢對佢嚟講,同結婚一樣咁重要喎!

柯仔今日(17日)出席一個支持器官捐贈嘅活動,食物及衞生局局長陳肇始、立法會議員葛珮帆及鄭泳舜等人都有出席。柯仔話,好多年前已經簽咗器官捐贈卡,依家仲有袋喺身邊,見到張卡又黃又舊,仲有唔少污漬,都足以證明柯仔冇講大話啦。

柯仔回憶起當年說服媽媽支持佢簽捐贈卡都唔容易,佢話媽媽為人比較傳統,都會覺得人死後要留全屍,所以都要睇啱機會才能說服到媽媽支持佢,佢估計單獨傾未必掂,於是揀咗一個全家人一齊食飯嘅日子,兄弟姊妹一齊幫口說服媽媽,自己就同媽媽講,捐器官可以幫到人,結果媽媽就喺半推半就之下答應咗嘞!要說服家人,諗下方法真係得喎!