政Whats噏：教育爭議多　吳克儉話繼任人搞得掂

香港嘅教育政策不時出現爭議，由小三TSA(全港性系統評估)或BCA(基本能力評估)，以至免費考中學文憑試(DSE)等，都成為好多市民嘅熱話。曾經掌管教育政策嘅教育局前局長吳克儉又點睇呢？吳克儉只係話相信佢嘅繼任人楊潤雄同現屆政府都有智慧作出解決方案，其餘就不便評論。

離開政府崗位快將一年，吳克儉話終於有時間，去從事過往一啲難以抽空參與嘅活動，譬如早前到內地「美食遊」，飽嘗中山脆肉鯇、石岐乳鴿同小欖菊花宴，又到海南省出席幼教交流，遲下就打算到土耳其觀光遊覽。雖然多咗時間玩樂，但吳克儉仍花精力於人力資源嘅研究。佢話人工智能嘅廣泛應用下，未來僱員應該如何自處，係政府、企業同專業管理人員皆要面對嘅重要課題。