政Whats噏：拍拖11載　黃浩銘神秘未婚妻曝光

因反新界東北案被判囚嘅社民連黃浩銘，日前獲法院批准保釋等候上訴。黃浩銘喺重獲自由之後，就同兩位女士共進晚餐，而呢兩位女士就係佢女朋友同前立法會議員劉慧卿(卿姐)喇，卿姐仲將佢哋嘅合照上載至社交網站添。黃浩銘一直對其女友保護有加，外界連其女友姓名及樣貌都唔清楚，估唔到同卿姐食飯，終令其女友揭開神秘面紗。

黃浩銘去年11月接受傳媒訪問時曾自爆有一名拍拖11年嘅女朋友，兩人原定去年結婚，可惜因為黃浩銘仍在服刑，婚期無奈押後。不過黃浩銘喺獄中唔止寫過2000幾字情信畀女朋友，仲籌備婚宴賓客名單，直言希望未來嘅另一半唔會離棄佢。而佢亦喺社交網站「放閃」，感謝女友對其不離不棄。

從卿姐上載嘅照片，黃浩銘女友斯斯文文，樣貌算幾標致。今次黃浩銘獲准保釋等候上訴，可以同女友重聚，唔知兩人會唔會藉此加緊籌備婚禮呢？