政Whats噏：陪家人有計　藍鴻震話公私結合

人稱「藍爺」嘅民政事務局前局長藍鴻震已經78歲，但依然周圍去、冇時停，早排佢就以國際專業管理學會會長身份出席立法會一個公聽會。藍爺話先前以學會代表去咗新加坡一間大學考察，之後又為咗自己公司啲嘢去咗杭州開會，但佢就嘆可惜，因為唔啱季節，所以食唔到當地出名嘅大閘蟹喎。

成日周圍飛，會唔會畀屋企人詐型，話佢冇時間陪屋企人呢？藍爺就話雖然已經退休，但有啲嘢覺得值得做都要做嘅，好似個學會咁，佢就算要貼錢都會搞。至於冇時間陪屋企人，佢透露秘訣就係要「公私結合」，例如去新加坡考察就會同個仔一齊去，去杭州開會時就帶埋太太，咁就唔使驚畀佢哋哦喇！