政Whats噏:工聯會新領導層 麥美娟最後生
工聯會新一屆領導層茶敍,工聯會理事長黃國指,有8人因年齡退出領導層,所以今屆有8名新人加入,現時領導層平均年齡係53歲,新班子變得年輕化,而領導層中,年紀最細嘅就係現年46歲、身兼副理事長嘅立法會議員麥美娟(Alice)嘞!
Alice笑指,會盡力扮到再後生啲,等大家相信佢真係最後生,其實佢同會長吳秋北係同年出世,不過一個年頭,一個年尾,只係相差少少,今後佢會提醒自己要為打工仔權益做得多啲,而今次茶敍後,相信都會被提醒要繼續維持最年輕嘅形象。
吳秋北笑住講起,被同事嘈佢喺社交網站寫得太多字,會冇人睇,他指其實自己唔係好識點操作。問佢怕唔怕女兒突然拍拖唔話佢知,吳秋北秒速回答「唔會!」稱雙方溝通都仲可以,對女兒有信心,而大女已經中四,讀書壓力都大,見家長嘅時候,仲要被老師提佢「我知你哋父母好忙㗎,你梗係唔係好理佢啦,你哋都要留意小朋友嘅功課㗎」,不過女兒其實讀書都OK,太太平時都有分擔照顧小朋友嘅事,自己同女兒嘅時間唔係好夾,但佢都堅持家長日一定要去,指如果唔去,太太會鬧㗎。
至於黃國就講起,自己個名同工聯會立法會議員黃國健好似,有時仲會收錯信,例如啲信原本寫啱黃國,但寄信人又會以為自己寫錯,加返個健字落去,相信係因為自己以往處理工會嘅會務較多。
工聯會今年70周年,將會有不少慶祝活動,包括會舉辦第一屆粵港澳大灣區技能大賽,分為三項,即焊接、飲食及髮型化妝。工聯會指,焊接大賽與日常燒焊唔同,焊接有好多花式,水底都可以燒焊,屬於國際性的技能大賽,而髮型化妝大賽就會包括特技化妝。