政Whats噏:泛民建制鬥冧友 法官任命恐流會

20180424
東網電視
更多新聞短片
泛民同建制乜都冧一餐,隨時搞到法官任命小組流會。(設計圖片)
今屆立法會喺前年一開鑼,建制派同泛民主派就因為各個事務委員會嘅正、副主席傾唔掂數,所以兩派一齊「冧友」,加入晒18個事務委員會,冧友更延展至草案委員會,而最新嘅「冧友」戰場就係資深司法任命建議小組委員會,有成32個委員,當中有好多都唔係法律界人士添!泛民同建制乜都冧一餐,隨時又搞到流會。
以往一有法官獲委任就會出現呢個小組委員會,過去報名嘅委員都只係得小貓3、4隻,上年只係開咗1次會,同埋只得5個委員。今次個委員會就會喺今個星期五(27日)召開,依家32人當中,建制派就佔18個,泛民主派就佔14個。
過去報名嘅委員都係律師、大律師,又或者有法律背景,而喺今次名單上,除咗有司法及法律事務委員會主席梁美芬、有大律師資格嘅公民黨楊岳橋、陳淑莊呢班法律界人士,就連金融界嘅陳振英、鄉議局嘅劉業強、教育界嘅葉建源,而一向關注土地、基建政策嘅自決派朱凱廸都榜上有名,關注法官任命安排添!
今次小組委員會係討論上個月特首委任2個外籍女法官,出任終審法院其他普通法適用地區嘅非常任法官。有建制中人就透露,曾經聽過市民對呢次任命有意見,加上見到一向支持性傾向議題嘅泛民議員都有加入,認為會對佢地推動議題會「如虎添翼」,所以先發動「冧友」,同埋佢哋都屬意由梁美芬做主席添!不過有泛民就擔心法官任命會政治化,再加上唔少議員都關心法官任命,所以先會有咁多人加入。
咪以為人多好辦事,其實人多都可以好累事。由於一般事務委員會、法案委員會嘅法定人數係委員嘅三分一,正如早前兩派「冧友」加入《廣深港高鐵(一地兩檢)條例草案委員會》,搞到委員會人數破天荒有64人,法定人數亦都提高至20幾人,最終亦發生流會情況。呢次小組委員會成30幾人,法定人數就要有10個,雖然一般都唔會開好多次會,但正所謂「唔怕一萬、只怕萬一」,分分鐘班議員唔上心或有乜甩漏,隨時又搞到流會,屆時咪又係浪費時間同公帑。