政Whats噏：梁栢賢明年退休　醫局任期最長CEO

醫院管理局行政總裁梁栢賢(PY)明年11月約滿喇，據了解，梁栢賢決定光榮退休，同老婆大人一齊「歎世界」，唔再續約。扣除假期估計明年7月31日就「Last day」，佢今日(26日)將會喺醫院管理局內務會議公布消息，係時候啟動遴選委員會搵「接班人」，而PY係紀錄以來做得最耐嘅醫管局行政總裁，計埋下年做足9年。

消息話，其實PY就快60歲，近年已計劃未來花多啲時間享受家庭時光，打算退下火線。扣除假期的話，下年7月尾就會係最後一日返工。佢今年5月都會放個短假期，同埋太太、大女一齊去美國，參加細女嘅大學畢業典禮，然後會繼續處理埋2019/20年度、2020/21年度嘅發展計劃，以及下一個十年醫院發展大計嘅規劃書。處理完所有事務就同太太一齊退休，全副心機放喺家庭。

PY於1985年加入政府擔任醫生，2000年出任食物環境衞生署副署長，2002年出任衞生署副署長，仲幫手成立埋衞生防護中心，2004至2007年間出任總監，負責防控疾病及策劃公共衞生緊急應變工作。至2007年借調醫管局出任質素及安全總監，帶領新成立嘅質素及安全部，期間處理過汶川大地震、馬尼拉人質事件嘅災後醫療工作，要臨急調派醫療隊去當地幫手，又要跟進人質事件傷者嘅病況。直至2010年11月獲委任為醫管局行政總裁，處理制度、醫生人手不足、促成新聯網劃界打破「山頭主義」，作風親民。

至於未來接班人係邊個？我哋八到至少有4個人選，其中包括幾個為人熟悉又資深嘅現任、前任聯網行政總監。