尋日(1日)正值勞動節，殊不知標榜會為勞工發聲嘅街工就爆出因財赤要解散旗下嘅「勞工組」，矛頭直指街工執委兼立法會議員梁耀忠(阿忠)，話佢多次迴避交代解僱原因。阿忠今日(2日)終於開腔交代，指街工一直靠籌款營運，但今年起有部分好友不滿街工嘅工作而停止捐款，捐款少咗就出現財赤問題，但強調無打算要炒人，只係想大家一齊解決財政問題。原來有人閂水喉搞到街工乾塘。

阿忠講番上月底嘅會員大會，話當日只係提出問題，希望大家能夠一齊解決，又話勞工組誤解咗佢，強調無講過解僱，又無打算解散，更加唔係唔滿意佢哋。佢解釋，佢名下嘅辦事處有18名員工，每年加薪約5%，「1人1萬(港元)1個月都要使18萬(港元)喇」，所以每月營運支出都錄得近7萬港元嘅虧損，過去依靠街工或籌款解決問題，但今年起有部分好友因為唔太接受街工嘅工作而停止捐款。

講到有部分好友唔滿意街工嘅工作表現而閂水喉，係咪同阿忠做「逃兵」嘅事有關呢？話說喺今屆立法會開波，阿忠主動放棄主持選舉主席嘅會議，變相令建制派可掌控大局，畀梁君彥順利當選主席，惹嚟非建制派支持者狂轟同狠批佢做「逃兵」。

阿忠慨嘆，以往每年都籌到逾100萬港元，舊年就只得約90幾萬港元，減少約20萬至30萬港元，形容情況係「突降」令佢有擔心。阿忠仲透露，今年初發現問題時，已將2名喺天水圍工作嘅員工由全職轉為兼職，而辦事處同街工共有約60多位員工，每月支出約170多萬港元，年花約2000多萬港元，所以最起碼要有約200萬至300萬港元做儲備，「但好明確依家無」。佢仲話上個月初有職員反映欠約82萬港元現金出糧，即刻要叫人找數，先有足夠現金流出糧，所以佢更擔心日後無足夠錢去承擔勞工組人工喎。

問到最壞打算會唔會同工黨合併，佢就話目前唔係討論呢個問題嘅時候。而根據佢最新向立法會遞交3月份嘅申報表，開支約為22多萬港元，當中包括聘請12名職員，而涉事嘅3名勞工組員工月薪，黎治甫每月獲1.5萬港元、譚亮英為1.9萬港元、王曉君為1.7萬港元，3人月薪共花約5.2萬港元。

照咁睇，街工已經面臨乾塘，依家又少區議員同只得阿忠一個立法會議員，點掘都難搵到水源支援喇！不過，呢個情況都唔係今日先出現，阿忠咁多年都唔識「睇餸食飯」，無錢仲搞咁多嘢，明顯就係理財不善，依家只係將問題曝光，都唔知可以點收科嘞！