上海仔借病潛逃　要掟西瓜落海先現身？

喃嘸喃嘸，返嚟喇！返嚟喇！和勝和前坐館泰國大毒梟「上海仔」郭永鴻，本來須於上月9日就涉嫌洗黑錢案到警署報到，但佢透過律師自稱喺泰國中風而冇現身。其實早前佢先畀人影到喺柬埔寨一個賭場內「行得企得」，完全唔似中咗風，令人質疑佢係借病潛逃，走咗佬去泰柬等地避難。

咁又係嘅，粵港澳近日大力掃毒除黑，打擊包括上海仔旗下嘅販毒集團，再加上佢喺着草前拍低咗多段影片，自編自導自演誹謗抹黑他人，自然唔敢返嚟香港。

之不過，上海仔嘅惡行同帶嚟嘅種種麻煩，經已引起各方關注，正所謂「出得嚟行，預咗要還」，為免誅連九族，好多人都逼緊佢返嚟「交人」。本月15日，上海仔須就另一宗涉嫌串謀刑恐、傷人及勒索案向香港警方報到，唔知到時佢又會否現身呢？如果佢再度潛水失蹤，可能就要搵個道士，一邊唸咒，一邊掟幾個西瓜落海，希望佢係生係死都識得浮番上水，以免繼續累人累物累街坊。

上海仔借病潛逃﹕http://hk.on.cc/fea/shanghai/