政Whats噏：踏上玄奘之路　郭位去取西經？

唐代高僧玄奘西行求法傳奇，後來成為《西遊記》唐三藏取西經嘅故事。香港城市大學校長郭位近日亦踏上玄奘之路，唔通佢又去取西經？其實郭位係帶領城大代表隊，參加第13屆玄奘之路商學院戈壁挑戰賽。今次係郭位首次「出征」，仲喺戈壁灘賽道徒步行咗近30公里，真係犀利。

呢個比賽係由全球華語商學院派隊伍參加，比賽路段設喺甘肅同新疆交界嘅莫賀延磧戈壁，各校學員需組隊徒步穿越112公里嘅戈壁沙漠。點解郭位行得30公里咁少？咪就係因為佢參加嘅係「體驗日」賽事囉！

雖然郭位係首次出征戈壁，但都順利行晒全程，當日仲係喺佢所屬嘅小隊之中行得最快，最先到達終點嗰個。不過佢就冇自行先過終點，而係喺終點前等埋其他隊員，先至一齊「衝閘」，以示團隊精神。雖然郭位都認為比賽環境惡劣，但如果有機會，佢都會再次帶隊參加咁話。