政Whats噏：姚思榮或因病退火線　傳姚柏良接棒

每逢立法會換屆選舉，議員新舊交替必然發生，而現時議會中已經有不少議員已經年屆六十五歲，相信二○二○年換屆選舉後將煥然一新。消息指，兩年後將年屆六十五歲嘅旅遊界議員姚思榮有意交棒，屬意由同屬旅遊業界嘅觀塘區議員姚柏良接任，所以下屆立法會或會再多一名雙料議員喇！

現時六十八名立法會議員嘅平均年齡為五十三歲，就算六十五歲都好，超過呢個歲數嘅議員大有人在，所以因年齡退下火線未必係主要原因。其實姚思榮近年受胃炎影響，曾經話病情同壓力大有關，或者因為健康問題而萌生退意。

至於盛傳會接棒嘅姚柏良，自零七年起就以獨立身份擔任觀塘(平田選區)區議員，而佢同旅遊業界關係都相當密切，事關佢同姚思榮一樣都係中旅社員工。姚思榮為中旅社副董事長，而姚柏良就擔任副總經理，姚思榮過去亦曾出任過副總經理一職，似乎兩個人嘅步伐都幾相似。

此外，姚柏良近期都陸續鋪路出任旅遊業界嘅要職，包括出任香港中旅港澳遊嘅總經理，而佢更喺去年以第一高票當選香港旅遊業議會理事，又於去年獲政府委任為旅遊業行業培訓諮詢委員會委員。他年初亦開始在報章撰文，全部都同旅遊業有關，內容涉及大灣區、內地旅行等，而早前更孖住姚思榮出席業界活動，似乎接棒之路已經鋪好。

姚思榮被問到係咪退下火線，佢就話距離換屆尚有兩年多時間，直指言之尚早仲未諗喎，到時再睇吓點，但就大讚姚柏良有學歷同履歷，而且夠年輕。

旅遊界功能界別議席，由二○一二年已落入中旅社手中，若姚思榮退落嚟，相信中旅社誓必力保議席。不過，姚思榮過去兩屆選舉都有競爭對手，如果要成功交棒，又的確要盡早鋪好路，先可以避免支棒落入其他陣營手中。