政Whats噏:劉聖雪街坊落區 瞓到最後一秒

20180507
東網電視
更多新聞短片
劉聖雪話當年選美時學嘅「貓步」已經唔記得晒,依家淨係記得準時落區。(譚敏聰攝)
近年政壇捲起美女旋風,新民黨繼捧起號稱「法律界桂綸鎂」嘅容海恩進身立法會後,曾參選港姐嘅劉聖雪(Dana)亦勢將喺下年底嘅區議會換屆選舉中出戰,而佢依家正喺港島東嘅康山做地區工作。本身住喺康山嘅Dana講笑話,作為當區居民嘅優勢係「可以瞓到最後一秒鐘」先落區,宣傳物品亦可以放喺屋企,最重要嘅係知道街坊需要,「因為我都係街坊嘛」。
自言唔介意被人形容為花瓶嘅Dana話,15年選美時學嘅Cat Walk(貓步)已經唔記得晒,依家淨係記得準時落區,嘗試認識每個街坊。距離區議會選戰仲有一段時間,Dana趁選戰前哨戰未打響,打算近期去一轉韓國首爾,但原來佢唔識韓文,亦唔睇韓劇,同韓國嘅聯繫嚟自喺美國讀書時嘅韓國室友,「嗰時兩個人一齊住寄宿家庭,有乜嘢事都互相照顧,感情好好」,佢曾經要求室友教韓國粗口,但係對方唔肯,後來兩個人都決心練好英文,所以就無咗學韓文呢回事。
另外,同樣嚟緊會去韓國嘅仲有新民黨政策總裁袁彌昌,但佢就笑言唔係同Dana一齊去,話唔想再多個「緋聞女友」。而袁彌昌去韓國嘅目標係買衫,話覺得韓風款式夠吸睛,不過近年韓式嘅男士打扮,尤其是髮型,都有愈嚟愈誇張嘅趨勢,袁彌昌就強調只欣賞啲衫,至於髮型就「不了」。