政Whats噏：呻監獄飯唔好　黃浩銘話只吊命

社民連副主席黃浩銘近年官司纏身，早排因爲佔旺藐視法庭案入獄，上月中啱啱刑滿，且另一案獲准保釋，可以暫時出獄。回復「自由身」兩個多星期嘅佢，今日(10日)岀席一個節目時就呻，監獄膳食「麻麻地」，最多只係「吊住你條命唔死囉」。不過太平紳士兼前立法會議員劉慧卿就話唔係，佢次次食親都「幾好味喎」！

黃浩銘話，監獄並唔係好似電影「監獄風雲」咁樣，喺佢眼皮下未見有職員打人，但衣食住就唔係好好。而卿姐就話自己最近去過赤柱監獄，在囚人士啲膳食有營養師跟進，黃浩銘即刻話「專登整嘅」，卿姐無奈話可能係，反映過都無法喎。

另外，卿姐又話社民連無議員代表將來點搞好？黃浩銘承認係艱難，強調無議席只係因為長毛梁國雄被取消資格(DQ)。對於係咪可以同其他黨「走埋一齊」，黃浩銘話要具體傾，睇吓要搞聯盟定合併，佢個人對呢個方向係同意，兼且係樂見其成。

佢舉例，2016年社民連同人民力量組成政治聯盟，「我哋行得好近」，係踏出咗第一步。問到係咪有傾過合併，佢就話管理層內冇，不過要時間去處理細節，始終有黨員覺得目前狀況好好。