政Whats噏：泛民擬反譴責峯鴿　白鴿黨取鼎擋箭

「峯搶手機」事件繼續發酵，新民黨立法會議員葉劉淑儀將於本月23日，喺立法會大會上提出譴責民主黨(白鴿黨)許智峯(峯鴿)動議。據了解，新同盟范國威(Gary)擬就動議提出反對，將把白鴿黨逼埋牆角要提早表態，若要表態反對即出爾反爾繼續「護短」，而有泛民中人直指若果建制派屆時再對峯鴿落井下石，白鴿黨唔排除攞涉嫌喺調查UGL事件上同前特首梁振英「打龍通」嘅民建聯周浩鼎做擋箭牌，兼且用嚟反擊建制派。

按一般程序，如無議員就譴責動議提出反對，就唔使辯論同表決，可將事件直接交由調查委員會處理。相反，有議員提出反對則要展開一輪辯論，如過去譴責鄭松泰的動議，人民力量陳志全提出反對。據悉，Gary提反對乃出於「善意」，希望表現出支持峯鴿嘅態度及爭取發言機會。不過，有泛民認為難以估計發言係「機會」抑或「危機」，若未能控制局面，達唔到「理想效果」，就唔應該貿然提出反對。據悉，民主派會議喺上周五(11日)諮詢各板塊，係咪提出反對預料到本周三(16日)先有定論。

不過，有泛民中人認為一旦提出反對即如同將白鴿黨推向牆角被迫表態，而一直表現出「嚴人律己」嘅白鴿黨，若要表態反對即出爾反爾成「護短」行為，隨時表態變出醜。知情人士話白鴿黨仍未傾掂最終要避席抑或坐定定唔撳掣，但有內部意見指會睇吓建制派點出招，如果建制派將峯鴿嘅罪行講到形同「姦淫擄掠」咁嚴重，唔排除會作出「反擊」，終極可能或會投反對票，但強調要睇吓同建制點樣「互動」。

目前建制派嘅「污點」，相信就要數到涉嫌喺UGL事件上同前特首梁振英「打龍通」嘅周浩鼎。有白鴿黨中人早已「念念有詞」，如果峯鴿「罪至要死」，周浩鼎就要凌遲，強調周所涉之事屬公職人員行為失當，白鴿黨勢將周浩鼎變擋箭牌，同峯鴿綑綁，建制出手就要度下點樣「救鼎」，事件令兩派同陷困局，最後會係「峯鴿齊救」定係「殺峯棄鼎」仍有待商榷。

另外，親建制派團體繼續狙擊峯鴿，團體「愛護香港力量」今日(13日)一行約10人，手持峯鴿嘅相、掃帚同橫額到峯鴿屋企樓下請願，高叫「許智峯辭職」等口號，仲話要用掃帚將許掃走。