從功能界別轉跑道出戰九龍西區直選嘅姚松炎，喺補選中落敗而回，事後唔少人都批評佢「太離地」，宣傳策略捉錯用神。根據姚松炎交嘅選舉開支申報，單係個人形象設計已經使咗12萬港元，包括影相、化妝同整頭。可惜搞幾多形象都幫唔到佢打入基層心呢！

根據開支申報，姚松炎共花約143萬港元，按佢獲得10.5萬票，每票值13.6港元。而佢亦得到約121萬港元捐款，包括公民黨捐2.5萬港元及民主黨捐7310港元。

姚松炎真係幾揼本搞形象，佢搵專業攝影師影相已經要8800港元，仲要用3000港元整頭同3000港元化妝，唔知男士化妝整頭搞乜要咁貴呢？此外，佢亦使近10萬港元推廣社交媒體貼文，佢仲扮過好潮嘅「旅行青蛙」吸金籌款，又扮睇相佬幫人睇相，係雜項開支見到有168港元買佛具用品，相信就係用嚟買求籤筒做道具，果然係形象行先！

另外，港島區參選人伍廸希都花約3.9萬港元，按佢得2202票，每票值17.5港元。而民主派初選、新界東參選人張秀賢就花16.6萬港元，獲13.6萬港元捐款。