政Whats噏︰要強積金勞資雙贏 區諾軒自嘲精神分裂

20180516
東網電視
更多新聞短片
在強積金的權益上,區諾軒想勞資兩邊都幫。(黃偉邦攝)
飲食界立法會議員張宇人尋日(15日)「亂入」立法會人力事務委員會,就強積金問題代商界發聲。立法會議員區諾軒自爆都想加入該委員會,事關佢未來有兩大任務,包括取消強積金對沖同埋最低工資檢討。佢仲話,喺取消強積金對沖上,自己企喺打工仔女角度就支持泛民工會嘅「基金池方案」,但屋企做服裝零售商生意嘅佢,都關注資方權益,又批評政府喺補貼僱主方面對中小企欠公平。勞資權益佢都想爭取,難怪區諾軒都自嘲「精神分裂」。
政府之前向立法會遞交取消對沖的初步構思,以劃線制取消對沖,提供兩重補貼予僱主。區諾軒話政府現時嘅方案會斷開打工仔年資,計算遣散費或長期服務金時,打工仔會蝕底,職工盟基金池方案建議成立基金並注資200億港元,就可以解決有關問題。至於資方方面,佢都質疑政府現時方案對大企業較有利,政府如要資助企業,冇理由唔係中小企行先。
被問到勞資雙方權益佢都爭取,會唔會分身不暇,區諾軒就話明白有時魚與熊掌未必可以兼得,不過佢只想改善現有方案喎。最後會唔會兩頭唔到岸,就要睇過先知喇。