政Whats噏：周庭水着拍片宣傳　盛惠2.3萬元

香港眾志常委周庭之前參加立法會港島區補選雖被DQ，但佢着泳裝落水拍宣傳片就非常吸引眼球。根據選舉申報，周庭買咗7萬港元Package拍3條片，第一條就係泳裝盛惠2.3萬港元，之後未開拍「續集」就被DQ，餘下片就變咗民主派立法會議員區諾軒頂上做男主角嘞！

根據申報，周庭一共花17.3萬港元，收到17.1萬港元捐款，即是佢仲要畀2000港元做宣傳。

佢嘅選舉團隊人才濟濟有15人，以眾志成員為主，出糧都用了5.2萬港元。團隊分工細膩，眾志副主席袁嘉蔚任日程秘書、副秘書長郭熙堯任財政、常委林朗彥任媒體製作。

此外，同樣被DQ嘅獨立本土派劉頴匡就使咗2415港元印宣傳品，沙田區議員陳國強及喺民主派初選自行DQ棄選嘅前公民黨成員曾健超，兩人都係零使費。