政Whats噏：范國威籌款得46萬　真係無朋友？

新民主同盟范國威(Gary)經補選重返立法會，作為有經驗嘅候選人，佢早已經計好要使幾多錢參選，所以公開籌款65萬港元做選舉經費。不過，根據開支申報，Gary最後只有約46.9萬港元捐贈，包括新同盟捐20萬港元現金同一名黨友2000港元現金。七除八扣下，甚少外來資金，唔通Gary真係無乜朋友？不過據了解，今次係Gary首次籌款，對於黨內而言可謂破晒紀錄喇！

Gary嘅總開支約為154萬港元，按佢獲得約18萬票計，每票值8.3港元。佢花最多錢喺宣傳品，使咗84.9萬港元，另外佢又請晒黨員幫手助選，人人都有些少津貼，共花21.6萬港元。

另外，新東候選人之一性傾向條例關注組成員趙佩玉都使咗5.9萬港元，主要用嚟印卡片同宣傳品，最慳就係搵老公陳仁傑做佢選舉代理人，咁就一蚊都唔使畀嘞。佢亦都有7位老友掏腰包捐現金共5.7萬港元，拉勻佢都只係要畀約2000港元參選啫。

至於參加民主派初選嘅工黨主席郭永健就使咗30.9萬港元，幸好捐款都有30.9萬，幾乎做到完全收支平衡，果然讀金融出身較識計數。