政Whats噏:0.5平方米之爭 增院舍空間恐續拖

2018年05月17日 01:00
東網電視
更多新聞短片
各有各叫價達唔到共識,隨時拖垮檢討無人獲利就真嗚呼囉!(設計圖片)

香港準備迎來高齡海嘯,各界都關心安老政策檢討。因應近年安老院舍質素為人所詬病,社會福利署由舊年開始,檢討推岀23年嘅《安老院條例》,其中就院舍「人均面積」各持分者叫價唔同,最新「暗盤價」為社福界要求為10平方米,政府堅持9.5平方米!據了解,呢個「0.5平方米之爭」,煞停政府本周五(18日)拍板嘅機會,要再約見各方斡旋,隨時又要拖番一年半載都未搞掂。

《安老院條例》喺1994年人口老化潮之初開始制定,至1996年全面實行,迄今都未有進行相關檢討或修改。呢個範疇係屬於勞工及福利局嘅,而社署喺舊年就成立「檢視院舍實務守則及法例工作小組」,成員包括社福界立法會議員邵家臻、私營院舍代表、服務使用者或照顧者等,合共26人。

現行法例下,院舍人均面積規定係6.5平方米,據了解,小組會議曾經投票,8平方米同9.5平方米嘅方案係獲得最多人支持。而邵家臻就聯同多個社福團體公開叫價,要讓長者有尊嚴地養老過活,大推「8+8」方案,即是房間面積要有8平方米,公共空間活動一樣8平方米,總數達16平方米。

私營院舍就企硬7.5平方米,而政府暗盤係緊貼目前甲一宿位嘅9.5平方米。邵家臻就批評,依家啲院舍都有8平方米喇,咁邊有改善到質素,建議設過渡期,由新院舍慢慢做,如果堅持9.5平方米係肯定唔會收貨。有知情人士透露,既然政府畀得9.5平方米,好好睇睇,上到10平方米,社福界都可以「收住貨」先。

工作小組經過近1年商討,政府預計會喺本周五會議上正式落實改革,將人均面積增至9.5平方米。據悉,至今個月初政府仲未同私院代表「拆掂數」,所以到今個星期先確定嚟緊會議唔會拍板,再次約各方私下會面「講數」。

咁係咪勞福局局長羅致光企硬唔肯讓步?消息指,勞福局都唔係想出「拖字訣」,0.5平方米都唔讓步,只係怕退得一次,社福界愈叫愈高無法抗拒,要劃線止蝕。消息人士仲話依家護理人員唔夠,地又唔夠,人就不斷老化,當局都係驚私院搞唔掂,最終市民受苦咋。一貫討價都係「開天殺價落地還錢」,不過各有各叫達唔到共識,隨時拖垮檢討無人獲利就真嗚呼囉!