政Whats噏:謝偉銓化身KOL 拍片吸引年輕人

2018年05月17日 21:24
東網電視
更多新聞短片
謝偉銓喺短片中一人分飾兩角,自問自答。(互聯網)

香港地少人多,最近公屋排上樓已經要等起碼5年,全城陷入搵地建屋嘅討論。重返議會兩個月嘅建築界議員謝偉銓(Tony)都加入討論,日前喺社交媒體上載「Tony學堂」,同大家講吓有乜嘢地可以用。平時一貫正經嘅Tony喺片入面一人分演兩個角色,自問自答,表現得跳脫輕鬆,佢笑稱乜都要試吓,仲話想咁吸引多啲年輕人留意添!

Tony係片入面介紹迪士尼第二期用地,由最初規劃到協議安排,甚至政府修改估算入場人次等,清清楚楚咁講出來龍去脈。不過,佢就話呢塊地依家放喺到「曬太陽」,其實足夠起一個18個洞嘅高爾夫球場,認為政府應該探討吓其他可能性喎。唔通佢想叫政府唔好搞高球場用地?佢即刻否認,只係潮流興講高球場,講幾多個洞大家好似易明解有幾大啫。

問到點解要一人分演兩角,Tony話自己一個講晒會好悶,咁試吓唔同方法拍攝,希望將來可以吸引到人上嚟一齊傾。咁有冇心水人物?佢就慨嘆難搵人,因為有啲人會擔心被抽水,目前節目無定時,只要有合適兼同業界有關嘅議題,都會拍片講吓喎。