探射燈：恐怖劏房喉管亂駁 一渠20戶污水灌屋
20180518
東網電視
更多新聞短片
屋宇署聲言正展開大規模打擊劏房違規行動，惟過去3年只有約200個證實違規。
屋宇署聲言正展開大規模打擊劏房違規行動，惟過去3年只有約200個證實違規個案。署方執法欠阻嚇力，變相縱容無良劏房業主「亂嚟」。有佐敦居民因樓上劏房改動間隔，令單位天花不停漏水變得蓉蓉爛爛，業主去年向署方投訴石沉大海，直至今年區議員介入才獲處理；葵涌有唐樓外牆喉管橫飛，糞渠更由一條駁7戶，暴增至20多戶；而不少劏房戶亦同樣飽受污水倒灌困擾。多區區議員炮轟屋宇署「Hea做」！
「幾年前樓上單位間做劏房，啲喉駁到亂晒龍，搞到天花不停漏水，之後仲開始冧石屎，試過手掌咁大塊，差啲砸死人！」居於佐敦唐樓一單位的張先生（化名）指，去年年中曾向屋宇署投訴，惟未獲正視，直至今年3月經當區區議員介入，才稍獲關注，「點解部門乜都做唔到？我只能白白睇住費盡積蓄買嘅單位，愈住愈爛！」
張先生的單位有如「災難現場」，客廳多處天花鋼筋外露，大部分電插座出現漏電，連光管亦因滲水無法開啟，客房書櫃上的書亦被浸至濕透，發出陣陣霉味。廚房更有半幅天花石屎剝落，牆身亦疑因長年腐蝕，露出多條喉管。單位一個廁所更因情況太惡劣，只能廢棄不用。
而在葵涌名賢大樓外牆，多個劏房延伸出來的淡水喉管亦隨處可見。有逾20條喉管亂插入外牆，有的只靠索帶將4至5條喉管胡亂紮成一團，有的更橫七豎八跨向對面單位。名賢大樓法團主席何錦鑑指，因劏房亂加喉管而導致淤塞爆渠時有發生，「有業主竟然將一條原本只係駁畀7戶嘅屎渠，駁畀廿幾戶共用，條渠頂唔順，最後倒灌入屋，搞唔掂又走嚟向法團投訴！」
劏房亂駁喉，就連劏房戶亦身受其害。「條污水喉改得唔好，其他劏房戶嘅污水同油污，倒灌嚟我單位，令成個廁所水浸，仲流埋出廳。」居於葵涌名堂大樓的何女士無奈稱，劏房單位廚房鋅盆及洗衣機污水，亦會在廁所渠口湧出。
葵青區區議員郭芙蓉直指，區內大廈亂駁個案隨處可見，惟屋宇署如「無牙老虎」，發警告信後甚少有積極跟進。油尖旺區區議員陳少棠則指出，不少劏房業主「貪便宜」胡亂改動單位間隔，違反《建築物條例》。
屋宇署發言人回覆指，在過去3年大規模行動中，共巡查604幢樓宇，期間就沒有遵從涉及的分間單位的清拆令提出293宗檢控。署方亦證實佐敦單位有違建工程，而葵涌相關單位則需時跟進。
-----------------------
《骰寶坊》誠邀各地【賭王】【賭后】挑戰神人境界，每日更有百萬籌碼等你領取！
立即免費下載，體驗《骰寶坊》最真實、刺激的多人在線骰寶遊戲！