政Whats噏︰梁耀忠與官睇「山墳」　街坊叫拆

葵芳興芳路與興寧路交界最近多咗件名為「安全島」嘅大型藝術品，畀街坊嘲笑似山墳，仲形容為「地區小白象」。身兼葵青區議員嘅立法會議員梁耀忠(阿忠)，尋日(21日)下午就聯同發展局官員及展品設計團隊代表到場視察，咁啱有位女街坊行過，就大聲叫︰「快啲拆咗佢！」連設計團隊都話，市民嘅反應係佢哋預想唔到。

阿忠尋日同發展局嘅官員及展品設計團隊去視察「安全島」，阿忠話佢原本帶同一名投訴者向當局表達意見，點知就有路過嘅女士即場要求清拆。官員聽完後都話會同設計團隊安排清拆日期。

相信街坊坦率嘅意見令設計團隊都幾尷尬。阿忠引述團隊代表話明白街坊嘅反應好強烈，佢哋會同當局傾清拆事宜。不過喺未移走前，暫時會做啲展示牌，解釋下件展品。唔通以為街坊了解多啲，就唔會咁反感﹖

呢個以「動感之都」為主題嘅比賽，由評審團選出4個藝術作品，並由各藝術作品嘅設計團隊喺指定地點安裝同展出，每個作品嘅安裝費用上限為85萬港元。阿忠就話，呢80幾萬港元唔止係安裝費，仲包埋移除費用嘅。