網民熱話:「賣身葬父」殺入大埔 老竇復活仔無影

20180522
東網電視
更多新聞短片
有大埔市民發現「亡父」復活,現身行乞。(Facebook群組「Tai Po 大埔」圖片)
前日(20日)旺角上演一場「賣身葬父」行乞鬧劇,有市民拍照上載到互聯網後受到各區市民關注,而丐幫「父子」穿煲後,兩人便分開搵食。今日(22日)「亡父」更趁佛誕「復活」,更殺入大埔開工,有網民認出其衣着打扮,直擊他在大埔行乞的情況。
今日中午,有網民在Facebook群組「Tai Po 大埔」報告「亡父」乞丐的行蹤,發現他在大埔墟一間連鎖超市門口行乞,惟他已能自行坐起,不像當日一副「死屍」狀,而「孝子」亦不在身旁,去向未明,遺下老乞丐與一個尼龍袋及爛鐵罐獨自行乞。有指最後老乞丐被街坊趕走。
一眾大埔網民力數乞丐,不少人直斥「過主啦!」亦有人提議要報警處理,有網民笑言今天天氣炎熱,容易引起「屍變」。
網民有話說
Jeany Poon:日日着住同一套衫出嚟搵食,其實佢都幾可憐...曲~
Ka Chun Chris Lee:想起周星馳唐伯點秋香。
Bell Ho:呀伯你翻生呀?
Tony Cheung:尋日喺旺角做死屍,今日喺大埔復活,復活節都過咗啦,今日係佛誕呀,都唔跟劇本做,霞姐扣起佢個飯盒!
蘇寶旗:天氣咁熱好易屍變!
※緊貼網民熱話,掌握最熱話題,請關注網民熱話fb: