紅磡路牌疑現簡體字？　網民嬲爆

明明冇過境，但揸揸吓車見到有簡體字路牌，會唔會當堂嚇一跳？近日有網民發現，紅磡有警告路牌出現簡體字，質疑政府「咁都搞得錯」？

社交專頁「福佳與林忌創作」於星期四（24日）上載圖片，圖中可見於紅磡暢運道近置富都會，有警告路牌的「檢」字，被標示為簡體字「检」。

相片一出，旋即引起網民熱議。有網民笑指，「睇唔明係咪唔會被檢控」、「個牌應該係假嘅」，又有人鬧爆政府「是是但但」，希望有關部門能盡快更正。

港鐵回覆《港呢啲》查詢，證實肇事路牌屬港鐵公司管理。事源早前因舊路牌脫色，因而須換上新路牌，而因相關部組處理失誤，導致出現有簡體字見於路牌上，港鐵亦表示正跟進有關情況。

---------------

《港呢啲》：大事小事騎呢事，東網嚴謹選題，輕鬆製作！