政Whats噏：元朗天價橋　謝偉銓左右做人難

元朗連接西鐵朗屏站至教育路以南全長五百四十米嘅高架行人天橋(元朗天橋)，爆出造價逾十七億八百萬元，即每米盛惠三百一十六萬元，被炮轟「天價工程」。造價太貴成各黨派狙擊目標，但大部分建制政團都邊鬧邊撐，決定有橋就「袋咗先」，相反民主派就提反建議推動建築師學會等四大專業學會喺幾年前提出嘅「Plan B」，此項目就令到剛重返議會嘅建築、測量、都市規劃及園境界議員謝偉銓（Tony）左右做人難。

元朗天橋項目上月底提交立法會交通事務委員會審議，雖然當時已知天橋造價過高，但未有太多討論。至今個月中議會陣線朱凱廸喺網上發動聯署叫停天價天橋，仲大肆宣傳元朗天橋「Plan B」方案，要求重新考慮由建築師學會等四大專業學會提出嘅混合式設計天橋。事態發展令作為業界代表嘅Tony進退兩難，業界勢關注Tony就項目撥款如何投下關鍵一票。

元朗天橋項目上周三首次於立法會工務小組委員會審議，經兩小時討論仍未能付諸表決，但Tony會上態度鮮明，話對政府做法非常失望，隨後更要求政府交出多項報告內容。直到尋日工務小組再審議項目時，Tony再狙擊政府有冇就天橋報價作評估，睇吓有冇空間慳錢。

朱凱廸亦提出臨時動議，要求政府就四大學會方案做估價但不獲處理，Tony係唯一支持臨時動議嘅建制派議員。而天橋項目審議約兩小時後表決，在十六票支持、十三票反對、一票棄權下獲得通過，投棄權票嘅亦係Tony，而項目下月將提交財務委員會審議。

元朗天橋「Plan B」係四大學會罕有地聯手提出，而且據知業內人士對於方案被區議會否決仍耿耿於懷，期望Tony在財委會反對政府的天價天橋方案。Tony回覆查詢時就好肯定話「依家係唔會支持」，認為造價的確「幾貴吓」，已要求政府提供更多詳細內容再作研究。至於財委會投票取向，Tony就話未知會反對定棄權，強調要先研究政府各樣資料。